NAVEKÎ KUŞTÎ JI NAVÊN TE YÊN KESK BÛM – 12’ê GULANÊ

Bo salvegera yekemîn a şehîdbûna şêxê şehîdan Şêx Maşûqê Xeznewî

12’ê GULANÊ

Min defên berbeyaniyê bi tîna stêrkên te zîz dikirin
Min heyhey û sermestiya mirîdên gizingê di zikra xewnên te diçandin
Min ayetên te bi keskê şîn ji zarokên Qamişlokê re digotin
Û bi ser çîroka te ya ji zersosinan û tavesorkan de dilop bi dilop, kêlîk bi kêlîk, kulîlk bi kulîlk û nav bi nav diherikîm
Bi ser bazinên kenê te de
Bi ser gazinên kemendên te de
Bi ser cejn û sema û derbendên te de mîna reşebayekî westiyayî, di naveroka baskên te de dihêwirîm, tu reşebayên temenê min li pey xwe, li pey sirûda zingîna xwe di kîl û qûmistanên bîranînan de dihêlî, tu şaneşînên gotinan vedimalî û tu ey daristana rojavayê derengmayî, min bi tîrên lêvên gulana xwe ya sêwîmayî dikujî
Û tu
Ey qublenameya ji genimê kînê
Min di navan de daçikînî, di xwînê de raxînî, min û xwe û van bajarên reşgirêdayî ji kelehên kuştinê daxînî
Şêx Seîdê Pîranê: Di hîzarê Pîranê de, mîna spiyê pêxemberan, bi çavekî xwe li te, bi çavekî din li berbiskên Hekariyan û bi çavekî li Amedê, Licê, li bîhokên pêldayî yên sînga Wanê dinêrî û ji xwedawendên rizyayî yên hişê xwe re digot: QEDERA ME YE
Di qederê de, bişirînên te di esmanê stranê de pêdiketin
Di qederê de, tiliyên te li ser balgeha heyva wendayî ya sînoran radiketin
Di qederê de, rûbarên laşê te ji çavkaniyên xwînê ber bi darêjgehên axînkêşana me ve dadiketin
Di qederê de, destên me yên ji oxiran, darbestên me yên ji nifiran û helwestên me yên ji mijê, bi taya mirinê diketin
Qedera me ye! Şêx Seîdê Pîranê ji şêxê şehîdan re digot û mûma dilê xwe radestî nehwirîna dayika min dikir
-Li gulan binêre ku çawan di pişkojn de dişewitin û li wan pencereyên kesk ku çawan ronahiyê ji bîr dikin, binêre
Dilê xwe wek şevçiraxekê li ser mista destê min bihêle û şaşika min di bêbextiya bagerê de ji bîr neke, xwe nêzî bend û ayetên vê beyhûdeyiyê bike û di hembêza xewna min bi payebilindî bimire
De were da em bi hev re bimirin
De were da em bi hev re li ser çequlên dîrokê bijîn û nema ji hev bitirsin
Tê bîra te
Nayê bîra te
Bîra min ji eşqa bîra te ye, bîra te jî ji eşqa jînê ye
Bîra min û te bîra tenhatiyê û bîra nisrînê ye, nisrîna ku daristana girî berz dike
Giriyê xwe rawestîne
Mirina xwe rawestîne
Mirina min rawestîne
Tu Şêxê min î
Tu mededa çiyê û maşûqekî din î

2006

Ehmed Huseyni

شاهد أيضاً

عليكو معاتبا وهو عتاب محق

الدكتور مرشد معشوق الخزنوي 17.06.2021 يكتب الأستاذ فؤاد عليكو خلال هذه الأيام سلسلة من المقالات …

المرصد السوري : في الذكرى الـ 16 لاغتيال الشيخ محمد معشوق الخزنوي.. نجله الشيخ مرشد للمرصد السوري: المجرم ماهر الأسد شقيق الطاغية بشار هو من أمر وأشرف على اعتقال واستشهاد الوالد

يطلق عليه “أيقونة الانتفاضة الكردية”، تلك الانتفاضة التي كلفت الأكراد في الحسكة عشرات الضحايا والجرحى …